وزیراعظم عمران خان جمعرات کو چار روزہ سرکاری دورے پر چین پہنچے جہاں وہ جمعے کو ہونے والے بیجنگ سرمائی اولمپکس کی افتتاحی تقریب میں شرکت کرنے والے دیگر عالمی رہنماؤں کے ساتھ شرکت کریں گے۔
وزیراعظم وفاقی کابینہ کے ارکان سمیت اعلیٰ سطحی وفد کے ہمراہ چینی قیادت سے بھی ملاقات کریں گے۔
وزیر خارجہ شاہ محمود قریشی، وزیر خزانہ شوکت ترین، وزیر منصوبہ بندی اسد عمر، وزیر اطلاعات چوہدری فواد حسین، قومی سلامتی کے مشیر ڈاکٹر معید یوسف، مشیر تجارت عبدالرزاق داؤد اور چین پاکستان اقتصادی راہداری (سی پیک) کے معاون خصوصی خالد منصور وزیراعظم کے وفد میں شریک ہیں۔
بیجنگ کیپیٹل انٹرنیشنل ایئرپورٹ پر وزیراعظم عمران خان کا استقبال چین کے معاون وزیر خارجہ وو جیانگ ہاؤ نے کیا۔ بیجنگ میں پاکستان کے سفیر معین الحق اور سفارتخانے کے اعلیٰ حکام بھی موجود تھے۔
بییجنگ سرمائی اولمپکس کی تقریب میں شرکت کے علاوہ عمران خان صدر شی جن پنگ اور وزیراعظم لی کی چیانگ سے بھی ملاقات کریں گے۔
ملاقات کے دوران دونوں قیادتیں علاقائی اور بین الاقوامی امور کے علاوہ دوطرفہ تجارت اور اقتصادی تعاون کو فروغ دینے کے طریقوں پر بات چیت کریں گی، خاص طور پر سی پیک فریم ورک کے تحت۔
چین کے ممتاز کاروباری رہنماؤں، اعلیٰ تھنک ٹینکس، دانشوروں اور میڈیا کے ساتھ ورچوئل بات چیت کے علاوہ دیگر دو طرفہ ملاقاتیں بھی وزیراعظم کے دورے کے ایجنڈے میں شامل ہیں۔
یہ وزیر اعظم کا چین کا چوتھا دورہ ہے کیونکہ اس سے قبل انہوں نے اپنا آخری دورہ اکتوبر 2019 میں کیا تھا۔
